Judges 18

1त्या दिवसांत इस्राएलावर कोणी राजा नव्हता, आणि त्या दिवसांत दानाचा वंश वस्ती करण्यासाठी आपले वतन मिळवायाला पाहत होता; कारण त्या दिवसापर्यंत त्यास इस्राएलाच्या वंशांमध्ये वतनातला भाग मिळाला नव्हता. 2दानाच्या लोकांनी आपल्या सगळ्या वंशातून, सरा व अष्टावोल यांतून अनुभवी असे पांच शूर योध्दे पुरुष निवडून त्यांना देशाची टेहाळणी व पाहणी करण्यास पाठवले; तेव्हा त्यांनी त्यास सांगितले, जा आणि तो देश पाहा. मग ते एफ्राइमाच्या डोंगराळ प्रदेशात मीखाच्या घरापर्यंत आले आणि त्यांनी रात्र तेथे घालवली.

3ते मीखाच्या घराजवळ होते, तेव्हा त्यांनी त्या तरुण लेव्याचा शब्द ओळखला; यास्तव ते तिकडे वळून त्याला बोलले, तुला इकडे कोणी आणले? आणि तू ह्या ठिकाणी काय करतोस? तू येथे का आहेस? 4तो त्यास म्हणाला, मीखाने माझ्यासाठी जे काही केले ते असे आहे, आणि मला मोलाने नियुक्त केले आणि मी त्याचा याजक झालो आहे.

5तेव्हा त्यांनी त्याला सांगितले, तू कृपाकरून देवाला सल्ला विचार, की आम्ही जो प्रवास करत आहोत तो सफल होईल किंवा नाही. 6तेव्हा तो याजक त्यास बोलला, तुम्ही शांतीने जा; ज्या मार्गाने तुम्हाला जायचे आहे, त्यात परमेश्वर देव तुमचे मार्गदर्शन करील.

7मग ती पाच माणसे निघाली आणि लईश येथे आली, आणि त्यांनी पाहिले की, ज्याप्रकारे सीदोनी अबाधित व सुरक्षित राहत होते; तसेच त्यात राहणारे लोक हे तेथे सुरक्षित आहेत. आणि देशांत त्यांना कशा प्रकारेही त्रास देणारा किंवा त्यांच्यावर अधिकार गाजवणारा एकही जण तेथे नव्हता. ते सीदोन्यांपासून फार दूर रहात होते, आणि त्यांचे कोणाबरोबरही व्यवहारीक संबंध नव्हते. 8नंतर ते सरा व अष्टावोल तेथे आपल्या वंशाजवळ आले; तेव्हा त्यांच्या नातेवाईकांनी त्यास विचारले, तुमचा अहवाल काय आहे?

9ते म्हणाले, चला! आपण त्यांच्यावर हल्ला करू! कारण आम्ही तो देश पाहिला आणि तो फार चांगला आहे. तुम्ही काहीच करणार नाही का? तुम्ही तो देश जिंकण्यासाठी आणि त्यावर चढाई करून ताब्यात घेण्यासाठी कंटाळा करू नका. 10तुम्ही तेथे जाल, तेव्हा तुम्ही अशा लोकांकडे याल जे असा विचार करतात आम्ही अगदी सुरक्षित आहोत आणि त्यांचा देश विस्तीर्ण आहे. देवाने ते तुम्हाला दिले आहेत. ती जागा अशी आहे की पृथ्वीवरील कोणत्याही गोष्टीची उणीव तेथे नाही.

11मग तेथून, म्हणजे सरा व अष्टावोल यांतून दानाच्या कुळांतले सहाशें पुरुष लढाईसाठी शस्त्रे घेऊन निघाले. 12तेव्हा त्यांनी जाऊन यहूदातल्या किर्याथ-यारीम जवळ तळ दिला; यास्तव आजपर्यंत त्या ठिकाणाला महाने-दान, दानाची छावणी असे म्हणतात; ते किर्याथ-यारीमाच्या पश्चीमेस आहे.

13मग ते तेथून पुढे एफ्राइमाच्या डोंगराळ प्रदेशात गेले आणि मीखाच्या घरापर्यंत आले. 14तेव्हा जी पाच माणसे लईश प्रदेश हेरावयास गेली होती, त्यांनी आपल्या नातेवाईकास असे सांगितले की, या घरामध्ये याजकाचे एफोद व कुलदेवता, आणि कोरीव मूर्ति व ओतीव धातूची मूर्ति आहेत; हे तुम्हाला माहित आहे काय? तर आता काय करायचे ते तुम्ही ठरवा.

15मग त्यांनी तिकडे वळून मीखाच्या घरी त्या तरुण लेव्याच्या घरात जाऊन त्याचे क्षेमकुशल विचारले. 16नंतर जी दानाच्या वंशातली सहाशे माणसे ती आपल्या लढाईची शस्त्रे घेऊन प्रवेशव्दाराशी उभी राहिली.

17आणि जी पांच माणसे देश हेरायला गेली होती, त्यांनी आत शिरून, ती कोरीव मूर्त्ति, एफोद, कुलदेवता व ओतीव मूर्ति घेतली; तेव्हा तो याजक लढाईची शस्त्रे घेतलेली जी सहाशे माणसे होती त्याच्याबरोबर दरवाज्यापुढे उभा होता. 18तर त्यांनी मीखाच्या घरांत जाऊन ती कोरीव मूर्ति व ते एफोद व ते कुलदेवता व ती ओतीव धातूची मूर्ति घेतली असता, तो याजक त्यांना म्हणाला, तुम्ही हे काय करत आहात?

19त्यांनी त्याला म्हटले, तू शांत राहा! आपला हात आपल्या तोंडावर ठेव आमच्याबरोबर चल, आणि आमचा बाप व आमचा याजक हो. एका मनुष्याचा याजक होऊन राहणे बरे की एका वंशाचा, आणि इस्राएलाच्या कुळाचा याजक व्हावे हे बरे? कोणते बरे? 20तेव्हा त्या याजकाच्या मनास आनंद झाला; यास्तव तो, ते एफोद व ते कुलदेवता व ती कोरीव मूर्ति घेऊन त्या लोकांबरोबर गेला.

21अशा रीतीने ते तेथून वळाले आणि दूर गेले. लहान मुलेबाळे, गुरेढोरे व त्यांची मालमत्ता ते आपल्यापुढे घेऊन चालले. 22मीखाच्या घरापासून ते बरेच अंतर दूर गेल्यावर, ज्यांची घरे मीखाच्या घराजवळ होती, त्यांनी माणसे एकत्र बोलावली आणि ते दान वंशाच्या लोकांच्या पाठीस लागले. 23त्यांनी दानाच्या लोकांस हाक मारली; तेव्हा ते मागे वळून मीखाला म्हणाले, तुला काय झाले म्हणून तू समुदाय घेऊन आलास.

24तो म्हणाला, मी केलेले देव तुम्ही चोरले आणि याजक तुम्ही घेऊन चालला, आणि आता मला दुसरे काही राहिले आहे काय? तर तुला काय झाले हे तुम्ही मला कसे विचारू शकता? 25मग दानाच्या लोकांनी त्याला म्हटले, तू आपला आवाज आम्हास ऐकू देऊ नको; नाहीतर आमच्यातली फार रागीट माणसे तुझ्यावर हल्ला करतील, आणि तू व तुझ्या घराण्याला मारून टाकतील. 26मग दानाचे लोक आपल्या मार्गाने गेले, आणि मीखाने पाहिले की आपल्यापेक्षा ते बलवान आहेत, यास्तव तो माघारी फिरून आपल्या घरी गेला.

27मीखाने ज्या मूर्ति केल्या होत्या त्या आणि त्याचा जो याजक होता, त्याला त्यांनी घेतले; मग लईशावर, शांत राहणा-या लोकांवर जाऊन त्यास तलवारीने मारले, आणि नगराला आग लावून जाळले. 28तेव्हा त्यांना कोणी सोडवणारा नव्हता, कारण ते सीदोनापासून दूर होते, आणि त्यांचा कोणाशीही व्यवहार नव्हता; ते नगर बेथ-रहोबच्या खोऱ्याजवळ होते. दानी लोकांनी तेथे पुन्हा नगर बांधले आणि ते त्यांत राहिले. 29त्यांनी आपला पूर्वज दान, जो इस्राएलाचा एक पुत्र होता त्याचे नाव त्या नगराला दिले, परंतु पहिल्याने त्या नगराचे नाव लईश होते.

30नंतर दानाच्या लोकांनी आपल्यासाठी ती कोरीव मूर्ति केली; आणि मनश्शेचा पुत्र गेर्षोम याचा वंशज योनाथान तो व त्याची मुले, देश बंदीवासात जाऊपर्यंत दानाच्या वंशाचे याजक होती. देवाचे मंदिर शिलोमध्ये होते, तोपर्यंत त्यांनी आपल्यासाठी मीखाची कोरीव मूर्ति जी त्याने केली होती तिची उपासना केली.

31